حوار مع صديقى ريتشارد دوكينز

سلسلة البحث عن اله : حوار مع صديقى ريتشارد دوكينز

بالنسبة للناس اللى بتقعد تقوللى ان فيه اخطاء املائية انا اسف, انا بحاول على قد مقدر اظبت لغتى وبكتب بالغة العامية اغلب الاوقات عشان موقعش فالخطأ ...شكراُ...

بقالى كتير مكتبتش حاجة; عشان قاعد بفكر فى شوية حاجات كده.

بقلب فى الإنترنت عشان برضوا أعرف وجهات نظر أشد وأقوى الملحدين عن وجود "الخالق",

لقيت فيديو عن مقابلة بن شتاين مع الحاج ريتشارد دوكينز

من الآخر فيديو عالمى: بن شتاين بيسأل فيه أسأله لريتشارد دواكينز.
تمنيت أنني لو كنت موجود; عشان أرد, وبرضوا كان نفسى كل الشباب اللى شايفين الحاج ريتشارد إنه اعظم الملحدين اللى موجودين دلوقتى بعد مع انتونى فلو أمن بوجود إله و "فقعهم زومبه" إنهم يشوفوا الفيديو ده.

قولت أنا هحط اللينك على البلوجاية, و هحط السؤال و الجواب و هعتبر نفسى كنت قاعد معاهم.

لينك الفيديو هحطه فى آخر التدوينه.

-------------- بسم الخالق العظيم الذى لا إله إلا هو------------
 إن هذه التدوينه هى فقط لنقض إجابات وأفكار الحاج ريتشارد دوكينز و ليست لنقضه كشخص فهو رجل مفكر, وعالم  نحترمه, ولكن لا نقبل نظريته الغير عقلية.
هو فاكس الصراحة بس لازم نقول الكام كلمه دول...

وطبعا اعذرونى على الترجمة اللى مش 100% الفيديو موجود فى اخرالتدوينه اللى عايز يشوفة باللغة إلانجليزية.

-----
بن شتاين:  اهلاً يا بروف, عامل ايه يا باشا؟! أنا بن شتاين و أسف عشان خليتك تستنانى, إيه الأخبار؟

ريتشارد دوكينز: تمام.


بن شتاين: إنت كتبت إن الأله هو شىء نفسي اخترعوه الناس المخدوعة؟ 

ريتشارد دوكينز:لا أنا مقولتش كده بالظبت, أنا قولت حاجة أحسن من كده, إدينى الكتاب أقرأ منه "يقصد الكتاب بتاعه".


بن شتاين:  أتفضل يا معلم " و إداله الكتاب"

طبعا الكلام اللى جى ده ريتشارد فقط هو اللى مسئول عنه ومكتوب فى كتابه.
ريتشارد دوكينز:  إله العهد القديم " الجزء الأول من الكتاب المقدس للدين المسيحي" ممكن نقول عليه أسوء شخصية خيالية :
غيور و فخور بذلك, غير عادل, حاقد متعطش للدماء, كاره للنساء, خائف من المثليين, عنصرى, مزعج, حاقد,قاتل أطفال, مهلك و مفتعل للأوبئة, عنده جنون عظمة الخ......
 " طبعا أنا مترجمتش الصفات كلها و ترجمت إللى اعرفه. 
الجمله كاملة بالغة الانجليزية .

بن شتاين: هو ده تفكيرك نحو الإله؟

ريتشارد دوكينز:أيوه.

بن شتاين:  طب دلوقتي الناس إللى مؤمنين باله الحب, والطيبة, والتسامح, والكرم المسمى بالإله بتاع الأيام ديه ؟ ليه تبوظلهم حياتهم؟ ليه متخلهمش يستمتعوا بحياتهم ؟

ريتشارد دوكينز:أنا مش عايز أبوظ حاجة لحد, أنا كتبت كتاب وهما يقرأوه او لأ ده يرجع ليهم و أنا أعتقد إن ديه حرية إنك تحرر نفسك من الأفكار الخرافيه البدائية ديه.

بن شتاين:يعنى إنت شايف إن الأديان أفكار خرافات بدائية ؟

ريتشارد دوكينز: أيوة


بن شتاين: إنت تؤمن إن التحرير هو أنك تقول للناس إن مفيش اله ؟

ريتشارد دوكينز: أعتقد ان بيبقى فيه إحساس الحرية إنّك تتخلص من الخرافات ديه.


بين شتاين: إيه دليلك؟ 


ريتشارد دوكينز: بيجيلي شوية جوابات من ناس عن تجارب شخصية.

بين شتاين: بيجيلك كام جواب؟, فيه 8 بليون إنسان عايش على الأرض.

ريتشارد دوكينز: أنا عارف الكلام ده ومتأكد
لا تعليق!
بين شتاين: إنت متأكد من إن مفيش إله كام فالميه ؟

ريتشارد دوكينز:99%.


بين شتاين: إنت عرفت منين انه 99%, ليه مش 97% ؟

ريتشارد دوكينز: مش عارف إنت قولتلى حط رقم فأنا حطيت. و إنا مش مستريح إننى أحط رقم اصلا.


بين شتاين: يعنى إنت متعرفش تحط رقم عليه ؟



ريتشارد دوكينز: لأ.



بين شتاين: ممكن يكون 49% ؟

ريتشارد دوكينز: لأ, أعتقد أكتر من 50%.


بين شتاين: عرفت منين ؟

ريتشارد دوكينز: معرفش أنا حطيت نقاش فالكتاب.

بين شتاين: مين إللى عمل السموات والأرض؟

ريتشارد دوكينز: إنت ليه بتسأل سؤالك بصيغة "مين".

بين شتاين: طب إزاى إتخلقت ؟

ريتشارد دوكينز: بعملية بطيئة جداً.
هبتدى أخش أنا من هنا بقى و هكتب بالون الاحمر  :D
بين شتاين: كيف بدأت ؟

ريتشارد دوكينز: مش عارف, ومفيش حد عارف. إحنا عارفين نوع الحدث اللى أكيد حصل بس.
نشأت الكون, هذا الحدث يؤكد وجود خالق, عندما يتواجد الشىء من اللا شىء " خلق من عدم" فهذا يبرهن وجود فاعل " صانع ذكي" قوة غير طبيعية.
" أَوَلَمْ يَرَ الَّذِينَ كَفَرُوا أَنَّ السَّمَاوَاتِ وَالْأَرْضَ كَانَتَا رَتْقًا فَفَتَقْنَاهُمَا وَجَعَلْنَا مِنَ الْمَاء كُلَّ شَيْءٍ حَيٍّ أَفَلَا يُؤْمِنُونَ " ( الأنبياء : 30)


بين شتاين: وده إيه ؟

ريتشارد دوكينز: أول جزىء الذى تكرر ذاتيا.

بين شتاين: وده حصل إزاى؟

ريتشارد دوكينز: مش عارف ولا حد عارف.

بين شتاين: إيه رأيك فى موضوع التصميم الذكي؟ هذا الموضوع لديه أجوبه على بعض المسائل الجينية و التطور.
هنا بقى الحاج ريتشارد صديقي الصدوق هيبتدى يخرف فالجزىء اللى جى ده
تعالو مع بعض نشوف الراجل اللى بيقول على فكرة الدين خرافات بيقول ايه :D
ريتشارد دوكينز: بص يا برنس, إحتمال يكون فى وقت قديم جداً فالزمن كانت هناك حضارة أكثر تقدما فى مكان ما آخر اتطورت ممكن تكون بطريقة داروين بمستوي عالى جدا من التكنولوجيا وهما اللى عملوا الحياة اللى احنا بنشوفها دلوقتى على كوكبنا ده 
وده مش مستحيل وممكن جدا كمان لو نظرت الى الكمياء و بعض العلوم هتجد دليل على صانع ذكى.
أنا لو كنت قاعد معاهم فالحقيقة كنت عملت صوت إعتراضى مشهور فى مصر.
يعنى إنت بروح طنط أم ريتشارد لا تؤمن بوجود خالق لهذا الكون كله ولكن بتؤمن بوجود كائنات فضائية معاها تكنولوجيا هى اللى عملت الحياة ديه ؟
 الراجل إتجنن باين!!!!

يكمل الحاج ريتشارد كلامة و يقول إن الصانع ده ممكن يكون أكثر ذكائا مننا وهو من مكان آخر فى الكون.

وحياة أمك ؟ :D

بين شتاين: يعنى إنت لا تؤمن بالتثليث او إله الهندوس او إله الأسلام ؟

ريتشارد دوكينز: لا طبعا ولا واحد منهم إزاى تسألنى سؤال زى ده

بين شتاين: ولا أى إله فى اى مكان ؟

ريتشارد دوكينز: ولا أى إله يا برنس !

بين شتاين: طب تعمل إيه لو أنت موت وطلع فيه إله؟

ريتشارد دوكينز: هقوله : سيدي.. ليه خليت نفسك مخفي وتصعب الامور علينا !

هو ليه دايما انتوا فاكرين إن الخالق ده مادة او طاقة 

ده حتى الطاقة لا يمكن ان ترى بالعين

الله "الخالق العظيم" ممكن تستدل عليه بالعلم
بمجرد النظر الى مخلوقاته!
فهو ليس بمادة ترى بالعين او طاقه تعرف قيمتها عن طريق قوانين اخترعتها أنت !

عارف المشكلة فى إيه ؟ ربنا مش مخفى, إنت اللى مبتشوفش !

لينك الفيديو

اختم كلامى بقولى هذا و أستغفر الله لى :D
و يارب ما كونش غلط فى حاجة و لو أنا غلطان فى أى حاجة يا ريت تقوللى وجهة نظرك لو صح هعدلها إن شاء الله 
ولو فيه اى سؤال اسألنى هنا
ask.fm/HeshamWatany
ولو عايزنى اتكلم فى موضوع معين قوللى هنا
twitter.com/heshamwatany