لو سمحت... انت ليه بتصلى؟

سلسلة البحث عن اله : لو سمحت... انت ليه بتصلى؟

العنوان شدك صح ؟

هجاوبك بس فالاخر عشان اخليك تركز معايه وقولك اللى انا عايزة وبعد كدة هديك الاجابة فالاخر
وحياة ابوك ما تنزل تشوف الاجابة و اقرأ من الاول :D

رحلتى من واحد عايز يتعلم الصلاة
الى الانجراف للمستوى الجاهل ثم الى ابواب الشك الالحادية وبعد كدة الى ...

بأختصار جدا .....

أمى كانت بتقعد تلح عليا اصلى كل شوية و كل م الاذان يأذن تيجى تقعد ترمى كلمتين
عشان اصلى و الموضوع وصل من كتر اننى كنت بطنش الى انها عشان تحرك مشاعرى انها تبتدى تخوفنى
اكيد جابت الفكر ده من القنوات الدينية....

جيت فيوم اسألها "من حوالى 3-4 سنين كده مش فاكر اوى"
العبد لله       : ماما, انا ساعات بفكر فى حجات غريبة و خايف
الست الوالدة : ايه هى يا حبيبى قول متخفش

العبد لله       : انا سعات بحس ان مفيش ربنا

الست الوالدة : ليه بتقول كدة يا حبيبى استغفر ربنا كل ده عشان انت مش بتصلى وبعيد عن ربنا

طبعا انا سكت و بدأت اشك فى نفسى

و ابتديت اننى اصلى

العصر تمام.. المغرب تمام.. العشاء اسبها لحد بليل انا كده كده بسهر للصبح و هصليها قبل الفجر

تانى يوم .... نسيت كل حاجة ورجعت لحياتى من غير صلاة ولا اى حتى الافكار اياها :D

,وبعديها بفترة دخلت على البال توك 

لقيت اكبر غرفة دردشة مكتوب عليها الحق او حاجة  كده

دخلت لقيتهم "بعض" المسيحيين قاعدين يشتموا فالدين بتاعى و الرسول و ان دين المسيحيه هو الحق و ان المسلمين غلبانين و مضحوك عليهم

وبيقولوا كلام مش كويس عن الرسول

طبعا اتصدمت ايه الكلام ده انا عمرى مسمعت حد بيتكلم على المواضيع ديه 

المهم سبت الموقع وطبعا مقدرش اوصفلكم احساسى كان عامل ازاى 

المهم عدت الايام 

و القدر مش فاكر ازاى و وصلت لمواق الالحاد --اكيد مش هذكر اسماءهم :P--

وبدأت اقرأ عن مسلمين سابوا الدين عشان كذا وكذا.

وبدأت مرحله الشك معى فى سن 18-17 على حسب ما اتذكر انا ذاكرتى فالضياع

المهم ربنا وقعنى فى اصدقاء فطبعا كنت خايف اسألهم الاسأله اللى عندى عشان انا مش عارف انا صح ولا غلط وخايف عليهم

انا اصلا كنت بخاف انام

المهم يوم مع يوم قمت سألت واحد من اصحابى لاقيته بيرد على كل اسألتى بردود مقنعه جدا, او انا اللى كنت مستنى اى اجابه عشان ارتاح نفسيا وخلاص

المهم عرفت انام مستريح

جيت فيوم قمت قولت هخلى الناس بقى الملحدين الاجانب يأسلموا على ايدى وكدة و هاخد ثواب وانا عارف الرد على كل حاجة :D

وبحكى لصاحبى قاللى انت مش جاهز وكده وخلى بالك و فاكس تخش على الكلام ده

قمت قولت فسرى

اخللى بالى من ايه يا روح امك ده الملحدين دابوا مننا " عبد الله بدر ستايل" 

"هنتكلم عن الشيوخ اللى شوهوا منظر الدين بعدين :D"

المهم....دخلت على موقع اجنبى بتاع الملحدين 

دخلت وكر الملحدين لقيت هجوم شرس جدا عليا و كله هجم عليا زى الفريسة  اللى دخلت على الاسود وهما فى اشد وقت للجوع 

المهم كان حسن حظى ان واحدة من مشرفين الموقع كانت موجودة فقامت قالتلهم يسبونى و هى هتتكلم معايه 

المهم 3 ساعات من المناقشة عماله تجبلى شبهات عن الدين و انا طبعا حمار ولا اعرف حاجه بس جوجل هو اللى كان بسياعدنى

بمجرد مكتب الرد على شبهة كذا بلاقى الرد المقنع جدا

المهم وصلت معايه للأخر قالتلى بس دينك بيقول كلام غير اللى المسلمين بيعملوة  بعد ما اقنعتها تماما ان العيب مش فالقرأن

وطبعا على قد ما انا علمت عليها و انا لسه اصلا مش بصلى 

قاعد اقنعا بحاجة و انا مش بعمل بيها  !
طبعا كنت غلطان اننى ادخل مكان زى ده و انا جاهل بدينى وجاهل فى علم الكلام و المناقشات 

بس ربنا سترها معايه

المهم اليوم عدا على خير ومرت الايام الى ايامنه دلوقتى وانا  كل ده لسه مش بصلى و عمال اسأل اسأله فلسفيه

انا الصراحة  صحابى اللى فاهمين دينهم زهقوا من كتر الاسأله 
وطبعا مع الاستعانة بشوية كتب زى كتاب حوار مع صديقى الملحد للدكتور مصطفى محمود

بس انا مصدقت الاقى حد اتناقش معاة من غير ما يقوللى استغفر ربنا يا ابنى او ايه الهبل اللى بتقوله ده

المهم امى برضوا من ساعتها و هى لسا بتلح عليا عشان الصلاة من ساعتها 

طبعا هى عشان عايزالى خير وخايفه عليا  انا عارف كده كويس بس الصراحة الكسل كان مسيطر عليا

المهم جيه قدامى كتاب اسمه "رحله عقل" للدكتور عمرو شريف 

استعرته من صديقى 

الكتاب ده وصلنى الى الايمان 100% 

وبعدها بدأت احاول اشوف ازاى احافظ على الصلاة

سألت كتير من اصدقائى كل واحد كان بيجاوبنى بطرق مش مقنعه الصراحة او على الاقل ماتمشيش معايه

 سألت واحد  صديق ليا متدين

قاللى

لما الأذان يأذن ركز فيه

الله اكبر الله اكبر

اكبر من كل شىء

اكبر من الشغل 

اكبر من الدراسة

اكبر من اى حاجة

نظريتة قوية جدا ولكننى اعترف لو كان قالهالى قبل ما اعيد التفكير فى ايمانى مكنتش هتعمل حاجه معايه

المهم بعد ما بدأت اصلى

فهمت كويس ايه كانت مشكلتى مع الصلاة بل ممكن تكون مشكلت الناس كلها اللى مبتصليش !

وهى ان معظم المسلمين دلوقتى مسلمين فالبطاقة بس 

ميعرفش حاجه عن عقيدتة غير شوية الكلام اللى بيسمعه من ناس سواء من التيليفزيون او من اصحابه او كده 

عن حلال و حرام وخلاص

مستنى منه انه يصلى ازاى \!

المشكلة مش فالكسل 

المشكلة مش فى اننى بقعد اقول ربنا هيسامحنى
لأ
المشكلة فى الايمان

قبل ما تفكر تصلى فكر ازاى تخللى ايمانك بالله قوى

بالعلم 

جرب اقرأ كتب زى 

-رحلة غقل 

-او حوار مع صديقى الملحد

اقولك على نصيحة : اعرف ربنا قبل ما تصلي له

احنا ليه بنصلى ؟

نخيل نفسك بتكلم واحد  كل كام ساعة متقسمة على اليوم كله خمس مرات و دة جزء من حياتك

على طول هيبىقى فى دماغك

نفس الفكرة فالصلاة ولله المثل الاعلى
انت بتذكر ربنا و تبعد وتنسى كل حاجه فحياتك 5 مرات فاليوم 

هتفكرة انك تغضب ربنا بأى شىء ؟ لأ و حتى لو عملت حاجه مش كويسة و استغفرت و تُبت

ربنا بيحب التوابين !

الحياة اجمل مما احنا فاكرنها
بسيطة جدا ومفهاش تعقيد

جرب بعد متعرف ربنا كويس انك تصلى مش هيفرق معاك حد ولا اى مشكله هتضايقك مهما كانت ! 

عارف المثل بتاع تف على الدنيا الدنيا تجيلك ؟ نفس الفكرة

انت لما تؤمن ان الدنيا ديه حاجة كده فترة زمنية صغيرة 

مش هيفرق معاك اى حاجة غير انك ترضى ربنا

وتبقى ادعيلى فصلاتك 

بس اهم حاجه اعرف ربنا قبل ما تصلي له !